Back Ел Ей Гънс Bulgarian L.A. Guns Catalan L.A. Guns Czech L.A. Guns Welsh L.A. Guns Danish L.A. Guns German L.A. Guns English L.A. Guns Spanish ال.ای. گانز Persian L.A. Guns Finnish

L.A. Guns

C'l artìcul chè 'l è scrit in Miranduléś Emiliàn

I L.A.Guns ad Phil Lewis in dal 2010


«
Here she comes, I never get enough of that sex action, S-E-X, who's next, yeah, sex action, and it always feels so good. Girl she got style, boy she got sleaze, ah, she's knocking them dead, she's got me down on my knees. Now listen, I'm a sex gun lover in the heat of the night, don't run for cover, I got you in my sights.»
(EN)(Sex action, 1988)
«
Ca-la lè ch'la riva, a n gh'n ò mai asè ad cal sès lè, S-È-S, chi è'l al pròsim? Sè, sès in córs, e al t fà star sèmpar acsè bèṅ. La ragasōla la gh à dal stîl, baghét l'è śgualsìda, ah lì lē la i fà murìr, la m à mis in śnòć. Scólta adès, mè a sòṅ 'n amànt da la pistòla fumànta in dal cór dla nòt, minga córar a i ripàr, a t tégn 'd òć.»
(MUD)


I L.A. Guns (Al pistòli ad Los Angeles) i èṅ un grup hard rock americàṅ, fundâ a Los Angeles in dal 1983, ch'al fà d'l hair metal.

La mùśica di L.A. Guns l'è da spés misa incòst a 'l sèni hair metal dla sità califurgnàna di an Utànta, in particulàr a 'l sotgènar sleaze metal purtâ avànti da i Guns N' Roses. Minga par gnint tri di mémbar uriginài ad quist chè (ma a gh'è anc ch'i diś tut i quàtar) i gh'n aṅ fat part a 'l inìsi.

Al grup la gh'à abû al sò mumènt ad sucès più grand a la fiṅ di an Utànta quand 'l à fat gnir fóra i sò dū prim lavōr.

In dal dè 'd incō, par via ad quistiòṅ fra i mémbar prinsipài dla banda, i eśìstan dū grup ciamâ L.A. Guns, òṅ purtâ avànti dal cantànt stòric Phil Lewis e òṅ invéci ch'al fà riferimènt a 'l chitarìsta fundadór Tracii Guns.

Biugrafìa

I prim pas

I L.A.Guns tòlt śò in dal 2008

Al grup al s è furmâ in dal 1983 a Los Angeles par maṅ dal chitarìsta Tracii Guns (Tracy Ulrich 'l è al sò nóm vér) dòp n'audisiòṅ minga andàda bèṅ cun i Ratt ch'i ìvan pardû in cal mèntar Jake E. Lee ch'l iva decìś 'd andàr a sunàr cun Ozzy Osbourne. Saràda l'esperiénsa cun i Pyrrus, Tracii 'l iva purtâ sèg al cantànt Axl Rose (William Bailey), ch'al daśgnìva da la band Rapidfire, a la vóś, Ole Beich a 'l bas e Rob Gardner a la baterìa.

'L an dòp però Axl al mòla la band par fundàr insém a 'l sò amìg Izzy Stradlin gl'Hollywood Rose e al sò pòst al vèṅ tòlt da Michael Jagosz par dar vita a soquànt demo. In dal 1985 al grup 'd Axl al pèrd di cumpunènt e al décid, insém a Tracii, ad furmàr-'n òṅ nóṿ ad paca cun Gardner dèntar, fundénd i nóm dal dū bandi.

'L è acsè ch'i nàsan i Guns N' Roses dal séndri di L.A. Guns e di Hollywood Rose. Ma 'l śuglèṅ al dura pôc e Tracii e Gardner i tórnan in di L.A. Guns. Dal cant suo, Axl al tóś al chitarìsta Slash p'r i Guns N' Roses.

Tracii al decìd però ad rivulusiunàr al sò grup tulénd Paul Mars Black cuma cantànt, Mick Cripps a 'l bas e Nickey Alexander, ch'al daśgnìva da la band punk di The Weirdos, a la baterìa.

In séguit a s śònta anc Robert Stoddard di Dogs D'Amour e cun cla line up chè i vènan rigistrâ soquànt demo fra 'l 1985 e 'l 1986.

Al sucès

Tracii Guns

In dal Mars dal 1987 Paul Black al vèṅ rimpiasâ par Phil Lewis ch'al daśgnìva da bandi cuma Bernie Torme's Gypsies, New Torpedosla e Soldier ma ch'l éra cgnusû specialmènt p'r avér dâ la vóś a la banda ingléśa Girl. Cal grup chè al gh'iva cuma cumpunènt anc quél ch'al sarés dvintâ al chitarìsta di Def Leppard, Phil Collen. Lewis 'l iva rigistrâ sèg dū àlbum, vindû bèṅ specialmènt in Giapòṅ.

Sèmp'r in cal mèntar, Mick Cripps al tōś al pòst ad Robert Stoddard, pasâ a i Faster Pussycat, mènt'r al bas al gh và Kelly Nickels. In dal 1988 a cambia anc al baterìsta ch'al dvénta Steve Riley di W.A.S.P..

Al prim disc di L.A. Guns al pòrta al sò nóm e al vèṅ fat in dal 1988 par la Polydor Records cun dimóndi dal parti vucàli fati par Paul Black prima ch'l andìs via. Stés quèl p'r al parti ad baterìa, sunàdi par Nickey Alexander anc se in dla cupertìna i èṅ dadi a Steve Riley. Al stîl druâ 'l è quél ad mòda in cal perìud lè, al sleaze metal, sunâ anc p'r i Guns N' Roses e Faster Pussycat. Al lavōr 'l è dimóndi gréś ma cumpàt e al sòna bèṅ finénd in di prim sinquànta pòst dla clasìfica americàna Billboard, cun i vìddeo di sìngui One More Reason, Electric gypsy e Sex Action traśmìs regularmènt par MTV. Da nutàr pò la cover di Girl Hollywood Tease e i lènt 'd One way ticket e Cry no more, quésta chè sōl strumentàla.

«
I need the highway wind blowin' in my hair, five thousand miles I've roamed now, I'm gettin' there, this is my destiny, the way that I choose, don't need no one to talk about, about love and blues, round, round, up and down, moves so fast, never touch the ground, high, high, touch the sky, don't come down, don't make me try, lost in space or any other place, living my dream on the moving train, gypsy, electric gypsy.»
(EN)(Electric gypsy, 1988)
«
A m vōl ch'al vènt al sópi in di mè cavìi in autustràda, a-j-ò girâ par 5.000 mija, a sòṅ drē a rivàr-ag, quést chè 'l è al mè destìṅ, la strada ch'a-j-ò sarnî, a n m vōl ninsòṅ par dascórar, dascórar 'd amór e ad blues, girànd dapartùt, sù e śò, la ś mōṿ acsè in présia, la n tóca mai par tèra, in élt, in élt, tóca 'l cēl, minga arbasàr-at, briśa pruàr a far-'m-al far, pardû in dal spasi o da n'atra banda, vivénd al mè sógn in sal tréno in muvimènt, sigàgn, sigàgn lètric.»
(MUD)
Steve Riley

In dal 1989 a vèṅ fóra al secónd disc dal grup califurgnàṅ, Cocked & Loaded (Armâ e cargâ), ric ad braṅ (quatórdas) e ad sìngui ad sucès cuma Never Enough, Rip & Tear e The Ballad of Jayne specialmènt (33śum pòst in dla Billboard Hot 100), dimóndi traśmìsa in dal ràddio. Robin Zander e Rick Nielsen di Cheap Trick i faṅ n'uspitàda p'r i côr.

Al disc (cun in cupertìna na ragasóla cavàda śò cun cun pistulòṅ in mèś a 'l gambi) al vénd da piò ad 500.000 còpi e al riva al 38śum pòst dla clasìfica di Stat Unî, ciapànd prima un disc ' òr e pò òṅ ad plàtin. I spetàcui dal viṿ i i védan sunàr cuma headliner in dal Régn Unî cun al séguit i Little Big Horn.

«
She was always something special, a diamond shining bright in the rain, everybody dreams of angels, no one will ever know how much I loved ya so. Now it all seems funny, kinda like a dream, things ain't always what they seem, what a shame, what happened to Jayne.»
(EN)(The ballad of Jayne, 1989)
«
L'è sèmpar stada un quèl speciàl, un diamànt ch'al brila sót a l'àqua, tut i sógnan di àngil, ninsòṅ al savrà mai quànt a gh'ò vlû bèṅ. Adès tut a pâr divertènt, un pôc cum un sógn, al ròbi i n èṅ minga sèmpar cum i pàran, che pcâ, cuś è'l sucès a la Jayne?»
(MUD)
Gl'L.A. Guns ad Phil Lewis

In dal 1991 al grup al dà vita a 'l sò tèrs lavōr, Hollywood Vampires par la Polydor Records e al sòṅ al s fà più cumplès, cun al tastéri ch'i s śòntan a chi àtar strumènt. I pès lènt (Over the edge, Crystal eyes, It's over now e na I Found You sunàda a la manéra di an Sinquànta) i próvan a ripétar al sucès ad The ballad of Jayne ma i n gh la càvan minga a far la sò cumpàrsa in clasìfica. Al disc però al dvénta listés ad plàtin (42śum in dla Billboard), purtâ in avanti p'r al sìngul Some Lie for Love, e dū di sò pès i vènan sarnî p'r andàr dèntar a dal culóni sunóri: Over the edge la finìs in Point Break, un film cun Keanu Reeves e Patrick Swayze, mèntar Wild obsession l'è druàda in Harley Davidson & Marlboro Man. In séguit, gl’L.A. Guns i partìsan p'r un tour in dal nòstar cuntinènt a drē a i Skid Row, sunànd a Milàn e Firénse. Na vòlta finî, Riley al s in và dal grup in dal 1992.

«
With crystal eyes she gazes like a desert flower in the morning rain, she's well aware of every promise made, she's a child of light in a world of pain.»
(EN)(Crystal eyes, 1991)
«
Lē la guarda fis cun di òć ad cristàl cum un fiōr in dal deśèrt sóta l'aqua dla matìna, la sà bèṅ tut al prumési ch'l'à fat, l'è la fiōla dla luś in un mónd ad dulōr.»
(MUD)
Tracii Guns

In cal mèntar Tracii Guns al fà gnir fóra anc un disc p'r un grup ad quéi super, tut i dū ciamâ Contraband, insém a Bobby Blotzer di Ratt a la baterìa, Michael Schenker di M.S.G. a la chitàra cuma lò, Share Pedersen dal Vixen a 'l bas e Richard Black di Shark Island a la vóś, ma 'l prugèt 'l è un fiàsc.

In dal 1992 al grup al rigìstra un EP, Cuts, cun dèntar al cover Night of the Cadillacs di Generation X, Suffragette City ad David Bowie e Papa's Got a Brand New Bag ad James Brown (ma la versiòṅ giapunéśa dal cd la gh'à dū braṅ da piò, Rock 'n' Roll High School di Ramones e Love Song). A la baterìa, al pòst ad Riley, che però 'l iva sunâ in soquànt canti, a gh'è Michael "Bones" Gershima.

In dal 1994 'l è al tùran ad Vicious circle (Sérć visióś) un disc dimóndi lung (quìndas braṅ, darsèt in dla versiòṅ giapunéśa) in dua a ś véd incóra Steve Riley in soquànt braṅ turnàr a piciàr la baterìa, mènt'r al basìsta Kelly Nickels al canta in Nothing Better to Do. Al disc al gh'à anc di braṅ fat bèṅ cuma la Face down ch'la vèra al lavōr, la ritmàda Long time dead, al rabìdi Killing machine e Kill that girl o la sugnànta I'd love to change the world, ma al patìs l'undàda grunge ad Seattle e la Polygram Records la i mòla lè.

«
At night the vipers rip my flesh, the bitch from hell is feeding, scratch my wounds to keep them fresh, she likes 'em young 'n' bloody. Now you gonna end up face down.»
(EN)(Face down, 1994)
«
Ad nòt al bisi i m sćiàncan la carna, la putàna da 'l Inféran l'è drē a magnàr, la śgranfgna al mè fridi par mantgnìr-i fréschi, i gh piàśan śóvan e sungṿinóś. Adès vuàtar a finirìv a cûl in śò.»
(MUD)

'L abandòṅ ad Phil Lewis

Phil Lewis

A cal punt lè, Lewis al mét insém un grup par sò cònt, i Filthy Lucre, mèntar Tracii Guns dal cant suo al dà vita a i Killing Machine.

Sénsa al front man ad riferimènt, che in dal 1997 'l arév fat gnir fóra cun i Filthy Lucre al disc Popsmear, i L.A. Guns i tóśan al cantànt Chris Van Dahl di Boneyard e di Cherry St. e al 29 'd Utóbar dal 1996 i faṅ gnir fóra al sò quint disc, American Hardcore, par la nóva etichéta CMC International, dódas braṅ sunâ a la manéra di Pantera, ma anc 'sta vòlta al disc al rèsta in di scafài. Cum al sòlit, la versiòṅ giapunéśa la gh'à dal bonus track, in cal caś chè la cover di Black Sabbath, Black Sabbath.

Sprand che Lewis al turnìs indrē, i L.A. Guns i màndan via Van Dahl ma Phil al và da la sò banda listés e al grup califurgnàṅ 'l è custrét a tōr 'n àtar cantànt, Ralph Saenz (ch'al daśgnìva da la cover band di Van Halen Atomic Punks), pròpria in dal mèś dal tour dal 1996/1997. Cun lì lò i rigìstran in dal Setémbar dal 1998 un EP cun siē braṅ dèntar, Wasted (Strasinâ), in mèś a i quài a gh'è anc la Cold gin di Kiss. Sèmpar in dal 1998, in Śugn e sōl p'r al marcâ giapunéś (cum 'l éra bèla sucès p'r al live dal 1992 Live! Vampires), a véd la luś anc na racòlta ad cover e ad canti fati da lōr, Hollywood Rehearsal (Al próvi 'd Hollywood), cun di braṅ 'd Iggy Pop, The Waterboys, The Clash, Led Zeppelin e àtar incóra.

In dal mèś dal Rock Never Stops tour dal 1998, Saenz al i mòla p'r andàr in di The Vow e Tracii Guns 'l è custrét a catàr-as 'n àtar cantànt, sarnénd pò quél di Bang Tango Joe Leste ma anc chi lò al dura pôc parchè al decìd ad turnàr in si sò pas. In mèś a cal masèl lè, i L.A. Guns i tōśan 'n àtar cantànt incóra, Jizzy Pearl di Love/Hate, par finìr al tour dal 1998.

Soquànt méś dòp, in dal Śugn dal 1999, i faṅ gnir fóra al sèst disc Shrinking Violet (Cuntrasiòṅ vióla), un disc prudót par Gilby Clarke ex chitarìsta di Guns N' Roses.

La riugnòṅ

Dòp soquànt àtar cambiamènt ad furmasiòṅ però al grup al tórna cum 'l éra prima: Phil Lewis, Johnny Crypt (a la chitàra incóra) e Kelly Nickels i tórnan a cà. In cal mèntar, in dl'Istâ dal 1999, a vèṅ fóra anc la racòlta Greatest Hits and Black Beauties, cun dal trasi nóvi e dal cansòṅ arfàti par l'ucaśiòṅ (a s cata anc na versiòṅ misćiàda dance e heavy metal ad Sex action). Al grup al fà di cuncèrt par la prumusiòṅ dal disc e 'l an dòp i faṅ gnir fóra al lavōr dal viṿ Live: A Night on the Strip.

In dal 2000, al grup al decìd ad rigistràr ad nóṿ al sò disc cun al sucès più élt, Cocked & Loaded, ciamànd-al in 'sta vòlta Cocked & Re-Loaded, cun un braṅ da piò, la versiòṅ mix ad Rip and Tear e na Malaria dimóndi fata bèṅ.

«
Midnight and I'm ready 2 move, don't need a reason, I got the groove, my fire is burning, it burns hot when I start, I'm working can't stop, don't need permission, don't need a cue, my motor's running and I'm coming after u, hold me baby hold me tight, you feel so good in the middle of the night.»
(EN)(Rip and tear, 2000)
«
Meśanòt e a sòṅ prònt a móv'r-um, a n gh'ò minga biśógn 'd un mutìṿ, a gh l'ò la diresiòṅ, al mè fóg al bruśa, al bruśa fòrt quand a tac, a sòṅ drē a lavuràr a n pòs briśa daśmétar, a n m vōl mia al parmés, a n m vōl mia un dai-mò, al mè mutōr al và e a végn dòp ad tè, tîn-um amór, tîṅ-'m stric, ta t sènt acsè bèṅ in dal cór dla nòt»
(MUD)

In cal mèntar, Tracii al sòna par pôc in di Poison al pòst ad C.C. DeVille.

In dal 2001 la banda (cun Lewis, Guns, Riley e un Muddy pasâ a 'l bas) la tórna cun un disc nóṿ ad paca, Man In The Moon (Óm in sla luna), par la Spitfire Records e un tour in di Stat Unî e in dal Régn Unî insém a i Faster Pussycat, ch'i s éran mis incóra insém, e i BulletBoys. In Dicémbar a vèṅ tòlt un basìsta nóṿ, Adam Hamilton, ch'al daśgnìva da i Joey C. Jones e da i The Gloryhound.

In dal 2002 i sònan in gir p'r al mónd insém a Alice Cooper e a vèṅ rigistrâ al nôṅ àlbum, cun al tìtul ad Waking The Dead (Daśdàr i mòrt). 'L è l'ucaśiòṅ par tōr un chitarìsta nóṿ (Keff Ratcliffe) e par sunàr a 'l Metal Edge Rockfest tour e àtar cuncèrt insém a Warrant, Ratt, Firehouse e Dokken. In cal mèntar i vénan fóra dal vóś ch'i dìśan che Tracii al sarév drē a far un prugèt par sò cònt insém a Adam Hamilton, Kris Kohls (baterìsta di Adema) e a Nikki Sixx di Mötley Crüe, i Brides of Destruction.

'L abandòṅ ad Tracii Guns

Phil Lewis cun da drē Stacey Blades

'L è acsè che in dal Nuvémbar dal 2003 al chitarìsta e fundadōr dla banda Tracii Guns al taca a lavuràr p'r i Brides of Destruction. Chi lò al gh vdiva la manéra par muciàr sù incóra na sèrta pupularità in dal mainstream parchè al l'iva pardùda a partìr da la fiṅ di an Utànta. In dal 2004 al partìs par di cuncèrt in gir p'r al mónd ma Steve Riley e Phil Lewis i n la tōśan minga tant bèṅ e i gh daṅ al bensarvî, dgénd anc che Guns 'l iva sunâ a di audisiòṅ p'r i Poison e i Red Hot Chili Peppers a dita dal chitarìsta Chris Holmes (ex W.A.S.P.) ch'l iva tòlt al pòst ad Tracii durànt al tour ingléś di L.A. Guns.

Al grup ad decìd in tut al manéri ad cuntinuàr sénsa ad lò, tulénd sèg Stacey Blades ex di Roxx Gang. Cun chi lò dèntar, in d'l Avrìl dal 2004 i faṅ gnir fóra un disc ad cover (e dū pès dal viṿ), Rips the Covers Off (Sćiànca la cupertìna), cun al canti Nobody's Fault di Aerosmith, Tie Your Mother Down di Queen e Custard Pie di Led Zeppelin fra i àtar. In cal mèntar a vèṅ fata anc na versiòṅ acùstica ad The Ballad Of Jane par la compilation dal canàl VH1 Classic Metal Mania: Stripped.

In Agóst dal 2005 invéci l'è la vòlta 'd un disc ad canti nóvi, Tales from the Strip (Racònt da la pista) un disc a la vècia manéra, gréś cuma la śmalta, cun di pès dûr cuma Hollywood's Burning, Rox Baby Girl, It Don't Mean Nothing, Crazy Motorcycle e 6.9. Earthsaker (cun 'n asōl ad baterìa ch'a s fà fadìga a créd'r-ag) e di àtar malincònic cum al sà far Phil (Skin, Electric Neon Sunset e Vampire).

Dū grup cun al stés nóm

Al chitarìsta Stacey Blades

Par Tracii Guns al ròbi cun i Brides of Destruction i n andàvan briśa bèṅ, al lōr secónd disc 'l éra stâ un fiàsc, dònca al dà vita ad un prugèt da par lò insém a Paul Black a la vóś, Nickey "Beat" Alexander a la baterìa e a Jeremy Guns (sò fiōl), sarnénd-as al nóm ad L.A. Guns anc par lò, parchè al gh'iva i dirìt al 50% cuma Phil Lewis.

Dòp soquànti questiòṅ, a vèṅ decìs 'd andàr avànti acsè listés, cun dū grup ciamâ a la stésa manéra: gl'L.A. Guns ad Phil Lewis e gl'L.A. Guns ad Tracii Guns.

Al 23 ad Favràr dal 2010, al grup ad Phil Lewis al fà gnir fóra 'n àtar disc ad cover, Covered in Guns, cun trédas braṅ fra i quài i gh'èṅ Don't Fear the Reaper di Blue Öyster Cult, Check My Brain di Alice in Chains, Let There Be Rock di AC/DC e Rock & Roll All Night di Kiss.

«
All our times have come here but now they're gone, the Seasons don't fear the Reaper, nor do the wind, the sun or the rain, oh, we can be like they are, come on baby, don't fear the Reaper baby, take my hand, don't fear the Reaper, we'll be able to fly, don't fear the Reaper baby, I'm your man.»
(EN)(Don't Fear The Reaper, 2010)
«
I nòstar dè i èṅ rivâ tut chè ma adès i èṅ andâ via, al stagiòṅ i n gh'aṅ briśa paùra dal Mśōr, gnanc al vènt, al sōl o la pióva, oh, a psrésan èsar cuma qui lè, andém pìcula, briśa avér paùra dal Mśōr, tó la mè maṅ, mia avér paùra dal Mśōr, a gh'la cavarém a vulàr, minga avér paùra dal Mśōr, teśòr a sòṅ al tò óm.»
(MUD)

Cumpunènt

Scott Griffin, basìsta di L.A. Guns ad Phil Lewis

L.A. Guns ad Phil Lewis

  • Phil Lewis - vóś (1987-1994, 1999-incō)
  • Stacey Blades - chitàra (2003-incō)
  • Scott Griffin - bas (2003-incō)
  • Steve Riley - baterìa (1988-1992, 1993-incō)

L.A. Guns ad Tracii Guns

  • Jizzy Pearl - vóś (2009-incō)
  • Tracii Guns - chitàra (1983-1984, 1984-2003, 2007-incō)
  • Jeremy Guns - bas (2006-incō)
  • Chad Stewart - baterìa (2007-incō)

Discugrafìa

Àlbum

  • L.A. Guns (1988)
  • Cocked & Loaded (1989)
  • Hollywood Vampires (1991)
  • Vicious Circle (1994)
  • American Hardcore (1996)
  • Shrinking Violet (1999)
  • Cocked & Re-Loaded (2000, arfacimènt dal disc dal 1989)
  • Man in the Moon (2001)
  • Waking the Dead (2002)
  • Rips the Covers Off (2004, cover)
  • Tales from the Strip (2005)
  • Covered in Guns (2010, cover)

Dal Viṿ

  • Live! Vampires (1992)
  • Live: A Night on the Strip (2000)
  • Live Ammo (2004)
  • Loud and Dangerous: Live from Hollywood (2006)
  • Hellraiser's Ball Caught In The Act (2008)

Racòlti

  • Best Of: Hollywood A Go-Go (1994)
  • Hollywood Rehearsal (1997)
  • Greatest Hits and Black Beauties (1999)
  • Black City Breakdown (1985-1986) (2000)
  • Ultimate L.A. Guns (2002)
  • Fully Loaded (2003)
  • Hollywood Raw: The Original Sessions (2004)
  • Black List (2005)
  • 20th Century Masters - The Millennium Collection: The Best Of L.A. Guns (2005)

EP

  • Cuts (1992)
  • Wasted (1998)

Vìddeo

Videoclip

  • One Way Ticket (1988)
  • One More Reason (1988)
  • Sex Action (1988)
  • Electric Gypsy (1988)
  • Bitch is Back (1988)
  • Cry No More (1988)
  • Never Enough (1989)
  • The Ballad of Jayne (1989)
  • I Wanna Be Your Man (1989)
  • Rip and Tear (1989)
  • Malaria (1989)
  • Some Lie 4 Love (1991)
  • Kiss my Love Goodbye (1991)
  • Over The Edge (1991)
  • It's Over Now (1992)
  • Long Time Dead (1994)
  • Tie Your Mother Down (2005)

VHS e DVD

  • One More Reason (1989, VHS)
  • Love, Peace & Geese (1991, VHS)
  • Hellraisers Ball (2005, DVD)
  • The Hollywood Years-Live and Loaded (2007, DVD)
  • Loud and Dangerous-Live From Hollywood (2007, DVD)

Culegamènt estéran

Developed by StudentB